muaba‑benn laabaal yen tuona

Ubiɛɔg puo Nal-ŋuul Ama kasied

Ne buol ne, a bu lii kasied-nba nba nya ATAPEB tuona n ninŋ.

Nal-ŋuul Ama tie Ubiɛɔg puo i, g mɔg bid banna. U mɔg piinna yen bina ŋantaa i. U sal kpe l saa bina 12 n nyan. U g ban g kua bituudm kalaatu, ama wan tan kua ciɛnm kalaatu ATAPEB yab buol dinne bina ŋantaa n nyan, g biɛ te miɛdl bina ŋanle n nyan. Wano n nagn kasied nba ne (sakpaan ŋmaalg n, bina 2017) g bu ŋɔn ciɛnm kalaatu nyuad.

« Yiɛlbiiug g be g pend yanbɔnm, l tebug g be dogda ŋaag. Ciɛnm kalaatu n teb'n k n bann liinu yen diɛnu g ji tund Yendu maam jaanddieog nba n ninŋ g niib saa piinlile. B daan tan sen jaanddepaaɔnŋ k n gad g fuond'b, k b ji maad k min gii baad laad daal g tund'b. K n maad'b k min yen b pastiɛl kul tund bonyenn i, k l maa Yendu kadaaɔg g tie ŋanle kaa.

Ciɛnm kalaatu po n te k n diɛ n bid bonŋann. N paand n bid pala kalaatu n ninŋ k l maa n ban g kalaatu mɔg nyuad. N ŋmagd'b k ban fid g te Yonmdaan tuonsunna g tɔgn wano Yendu buam n. N pal bo tu be tonm tonm, ama Yendu maam liinu yen l tundu n nyan'n l n ninŋ. N biɛ bo siɛn fai niib n, ama dinne n ji g siɛn fai. Niib gii bua ban gii ja nand, n bu fid g muand'b Yendu maam lann i kaa g te'b cegli. N gii saa sɔnu, n kan fid g tud k l maa n fid g lii palag-nba po doi sana muaba n. N gii tug kuadm g saan daag, sua kan fid g di'n. N biɛ gii saan yen n big lann i kaa min mɔno dogda ŋaag, n bu fid g bann ban maad k min nyu nyɔgu nand, lann i kaa k n nyun n big nand.

Diyenn n daan saan daag n g yed g sua ń tien'n kredi, k u tien mesaas kua, k n diid g sua ligli g baal. N daan maad'o mii ligli g baal k u yie i. Nifan n daan tan pend g gbiɛ k t gag, k u sed g bual k n ŋɔn'o l niimn. K u gaal n pɔrtabl g sua yen mɔni, ligli g baal. G daan ŋann guan g tien'n l kobg kredi. L kul ne tie ciɛnm kalaatu nyuad i.

N tiend Yendu balg k l maa wano n tie'n l paab nba g mɔg gbennu k n suun u tuonn. Yendu ń tien ATAPEB yab yen yab nba kul tod'b yen ligli k l tuonn sonm balg bonciɛnn. Yendu ń tod'b k n lieb nba daa tenn g be yanbɔnm yiɛlu n ninŋ, ń mɔ ń fid g nya l n ninŋ, k t kul ń fid g yal t kua. »

(Sakpaan ŋmaalg n, bina 2017)